Hey ...

So, ha ghöert ihr hettet gärn ae Feedback vo mir, wa i zu mim ufenthalt do z'Anguilla mein. ...machi doch..

Also, fang mol a, weiss nur nöd gnau wo. Alles aagfange hät jo mitemne Mail woni kriegt ha, dass d'Francie ä Nanny suecht und vorallem brucht.
Bi idea Schwiiz leider arbetslos gsi und diae Chance isch grad huere glägä cho. Ha mi bi ihre gmolde und ä Wuche spoeter bini scho im Flugi gsesse. Mega spontan und churzfristig aber hät halt eifach müäse so sii.

Bi noch minere recht lange Reis mega härzlich empfange worde. Uuuu suess und uuuu liaeb. Bi sooo froh gsi endli uf Anguilla Bode z'stoh.

Abgreist bini eigentli mit zwei Koffer idea Schwiiz, acho aber nur mit eim. Da isch en rechte scheiss Start gsi. Ha nämli kei einzigs Shirt, Badhose oder X andres Zueg. Huere mueehsam.

Naja, muä jetz halt alles neu poste und vodä Francie lehne. Has mer chli anderst gwünscht aber sind jo flexibel.

Uf jedefall hani jz scho zwei Wuche verbii und muä ganz ehrlich saege isch mer nöd liecht gfalle. Sind mega harti Täg gsi. Noed nur wieli halt d'Kids etc noed kennt ha, sondern eifach wiels ganz andersch isch als min gwohnte Alltag. I kenn überhaupt niemert, cha mi nöd komplett verständige, ha mi im Huus nöd wuerkli wohl gfühlt und isch eifach alles huere fremd gsi. I cha jetz noch denä zwei Wuche säge dass es mir aber guät goht. Denk ha s'Schlimmste überstande und i ha mi au scho recht iiglebt.

Mit dä Familie hanis mega guäte. D'Chind sind zwor jeeeenes streng aber au uuu suess und d'Francie isch sowieso dä Hammer. Sie isch mega cool druf und chli ähnlich wiae mini Mom, da macht vieles eifacher. Cha mit ihre so ziemli ueber alles rede, ha voll Freiheite und werde mega unterstützt wenni irgendwo mueh ha. Echt uuu laes.

Nochdem mer d'Kids i dae Schuel abglade haend, d'Francie go schaffe isch und ich chli was im Hushalt gmacht ha (wa leider nuem würkli ersichtlich isch sobald d'Kids s'Huus betrete händ “smile”), denn gangi fast immer an Strand. Mein Gott isch da schö. Wer no nie do gsi isch chas sich noed vorstelle und alli andere wüsset vo wa i red. En riiiese Traum. Bi frühner nie en Fan vo Stränd gsi und au idea Feriä meistens in Pool aber do hani mi echt verliebt. Schoal Bay isch dä absolut hammer und denk dä schönst Platz uf dä Welt. Gnüss jedi Minute do am Meer.

Am Nomi chömet jo denn d'Kids wieder hai, resp. i gangs go abhole. Ab dem Punkt wo alli vier im Auto sitzet, gohts los. Haha. Isch maengmol uuu huäre luut und ä mega Chaos aber mer schlönd üs dure. Es git do au Lüüt wo denä vier jede Tag was usem Candy Shop bringet, unter anderem lärmmachendi Hühner. Nöd würkli ä schlaui Idee. Aber denk diejenig hät us ihrne Fehler glernt.

Dähai sind alli zfriide solang dae PC oder TV lauft aber si händ nöd so de guätä wen's mönd Husi machä oder ufruumä aber d'Ziit bis zum z'Nacht wenn “üsi” Mom wieder hai chunt goht recht schnell umä.

Nebst dä vier Zapplis häts jo no so zwei schwarz-wiissi Monster. Gsehnd mega süäss us aber idea Nacht laufsch eifach am Beste noed z'noech bim Bett dure, soes werdet dini Fues attakiert... und gib ihne jo immer gnuäg z'Fresse, soes häsch ä Theater.

Leider isch mol wer uf sone wiiteri dummi Idee cho, heisst NASSFUETTER. Naja, 1x im Tag isch jetzt da halt Standart und irgendwenn händ denn diä 4Beiner au mol gnueg, muänd halt uf Trochäfuetter umstiige noch ihrer Portion. Aber z'dünn sinds sicher nöd.

Jo wa chönti eu sös no säge..... Hmm, bi jz scho 2x in Usgang do uf dä Insle und werd am W-end viellicht uf d'Nochbuurinsle goh. Ha uu huere Fun gha. Haet zwor nöd X Clubs oder Bars aber so paar chlini Plaetzli sind mega glatt. Freu mi scho uf St. Marteen, mol luege wa döt so lauft.

Bi mi jo eigentli gwöhnt zum uf dä rechte Siite fahre aber noch paar Stündli Praxis uf dä linke Siite hani mi scho guät z'recht gfunde und hoff nöd dassi ä Gfahr fuer di ganz Bevölkerig bi.
üsä Suzuki Jeep isch notürli en riiese Luxuswage. Hät mega spezielli Lackierig (grau-schwarz-wiiss), isch ä spontans “Gabriolet” wiel halt d'Fenster je noch Lust und Luune vom Benzinschlucker schlüsset oder ebe au nöd. Aber chasch nur hoffe dass recht regnet, denn bisch grad duschet und hasch zudem mol s'Feeling vom Sitze ufemne Wasserbett.
Nei alles i allem isch würkli mega gät und i freu mi mini Ziit do doerfe z'verbringe. Bi gspannt wa no alles passiert, uf mi zuechunt oder wa mer no erlebet.

Wuensch eu allne ä guaeti Ziit.

Ganz liebi Grueessli us Anguilla vo euem BondGirl